Alisher Uzoqov Orol dengizi muammosini barcha uchun fojia dedi

Qoraqalpog‘iston Respublikasi hududida joylashgan Orol dengizining qurib borishi bugun butun dunyo olimlari va ekologik tashkilotlarning e’tibor markazidagi muammolardan biri bo‘lib qolmoqda. Necha yillarkim bu masalaning yechimi topilgani yo‘q. Orol muammosi, uni hal etish yo‘llari masalasida qanchadan-qancha ilmiy-amaliy anjumanlar, konferensiyalar tashkil etildi. Nufuzli xalqaro tashkilotlar tomonidan Orol dengizi qurishining oldini olish uchun loyihalar tanlovlari e’lon qilindi, katta sarmoyalar ajratildi. Biroq bu tabiiy hodisaga chek qo‘yishning imkoni topilganicha yo‘q. O‘zbekiston Respublikasi Madaniyat va sport ishlari vazirligi tashabbusi bilan viloyatlar va Qoraqalpog‘iston Respublikasida “Biz buyuk yurt farzandlarimiz” yoshlar festivali o‘tkazilib kelinmoqda. Ayni damda festival Qoraqalpog‘iston Respublikasida o‘z ishini davom ettirmoqda. Festivalda faol ishtirok etayotgan san’at olami vakillaridan biri aktyor Alisher Uzoqov ham ijtimoiy tarmoqlardagi sahifasi orqali Orol muammosiga e’tibor qaratdi. “Oroldamiz. Men muzeyda Orolning avvalgi holatini ko‘rdim. Bu barchamiz uchun fojia. Men Orol yana o‘z ahvoliga qaytishini chin qalbimdan tiladim”, deb yozadi Alisher Uzoqov.
Категория: SHOU-BIZNES habarlari \| Теги: muammo, Orol dengizi, alisher uzoqov
Просмотров: 1677 \| Рейтинг: 0.0/0