Amerikaliklar Jastin Biberni mamlakatdan haydab chiqarishni so‘rashdi

AQSh prezidenti ma’muriyati saytida iltimosnoma (petitsiya) paydo bo‘ldi. Unda Oq uy ma’muriyatidan kanadalik pop-ijrochi Jastin Biberni mamlakatdan haydab chiqarish so‘ralgan. Iltimosnoma mualliflarining fikricha, Biber "nafaqat amerikaliklarning xavfsizligiga tahdid soladi, balki yoshlarga yomon ta’sir ham ko‘rsatadi”.

23-yanvar kuni saytga joylangan iltimosnoma Oq uy saytining "We, The People” ("Bizkim, xalq” degani; AQSh Konstitutsiyasi ayni shu so‘zlar bilan boshlanadi) deb nomlangan ruknida joylashtirilgan. Unga 25-yanvargacha 10 mingdan ortiq kishi imzo chekkan. Agar 22-fevralgacha mazkur murojaatnoma 100 mingta imzo yig‘a olsa, qoida bo‘yicha, AQSh hukumati unga munosabat bildirishi kerak bo‘ladi. Ammo amalda Oq uy ko‘pincha bu mavzu uning vakolati doirasiga kirmasligini bahona qilib, bunday murojaatlarga javob berishdan qochadi.

Murojaatning sababi shundaki, Jastin Biber 23-yanvarga o‘tar tunda Mayami-Bich shahrida alkogol va giyohvand moddadan mast bo‘lgan holda mashina haydagani bois qo‘lga olingan. Bundan tashqari, uning haydovchilik guvohnomasi vaqti ham o‘tganligi ma’lum bo‘ldi. Xonanda 2,5 ming AQSh dollari miqdoridagi garov puli evaziga ozodlikka chiqarib yuborilgan.

Biber AQSh huquq-tartibot idoralari e’tiboriga birinchi bor tushayotgani yo‘q. Joriy yilning 20-yanvarida uning uyidan giyohvandlik moddalari chiqqan, ammo politsiya o‘shanda uni qo‘lga olishga haqli emasdi. Chunki uning hovlisida boshqa sabab bilan – qo‘shnisining mulkiga ziyon yetkazish masalasida tintuv o‘tkazilayotgandi. Biroq bu ish bo‘yicha ham unga nisbatan ayblov e’lon qilinmagandi.