AQShda boks bo‘yicha sobiq jahon chempioni otib o‘ldirildi

O’Nil Bell professional karyerasini 1998-yilda boshlangan, 2005-yilda esa Deyl Braun ustidan g‘olib chiqib, IBF yo‘nalishida jahon chempionligini qo‘lga kiritgandi. Jan Mark Mormek bilan bahsda uni o‘ninchi raunda nokautga uchratib, WBC va WBA yo‘nalishlarida jahon chempionligini tortib oladi.Mazkur jang Bell karyerasining cho‘qqisi bo‘ldi, shundan so‘ng uning faoliyatida pasayish boshlandi. U Mormekka revansh bahsini boy berdi, keyinchalik Tomash Adamek va Richard Xolldan ketma-ket ikki mag‘lubiyatga uchradi. Faoliyatidagi so‘nggi jangni O’Nil 2011-yil dekabrida o‘tkazib, birinchi raunddayoq Riko Keysonni nokautga uchratgandi.Fox News telekanali ma’lumotlariga ko‘ra, 41 yoshli sobiq jahon chempioniga Atlantada to‘rt nafar noma’lum kimsa hujum qilgan. Bokschi va yana bir yo‘lovchi avtobusdan tushayotganda ularga qarata o‘q uzilgan. O’Nil qarshilik ko‘rsatishga harakat qilgan, biroq otib o‘ldirilgan.Politsiya jinoyatchilarni qidirishni boshladi. Taxminlarga ko‘ra, hujum talonchilik maqsadida amalga oshirilgan.