Чилида кучли зилзила кузатилди

Чили шимолида магнитуда кучи 6,7 баллга тенг бўлган ер силкиниши кузатилди, дея хабар бермоқда АҚШ Геология хизмати. Якшанба куни содир бўлган зилзиладан сўнг цунами ҳавфи бор ҳудудларда яшовчи 100 мингдан ортиқ киши эвакуация қилинди. Мамлакатнинг фавқулодда вазиятлар миллий бошқармаси директори Рикардо Торонинг айтишича, эвакуация фақатгина эҳтиёткорлик мақсадида амалга оширилган. Метеорологларнинг хабарига кўра, цунами юзага келган тақдирда ҳам у қадар кучли бўлмайди. Зилзила эпимаркази йирик Икике порти шимоли-ғарбидан 61 километр узоқликда бўлган. 2010 йилнинг феврал ойида Чили мамлакатида магнитуда кучи 8,8 баллга тенг бўлган зилзила содир бўлган, унинг оқибатида цунами юзага келган ва 524 кишининг ҳаётига зомин бўлган. Қайд этиб ўтамиз, 17 март тунги соат 2:22 да пойтахтимиз Тошкентда ҳам у қадар кучли бўлмаган зилзила кузатилди. Тошкент сейсмологик станциясининг берган маълумотларига кўра, эпимарказда зилзила кучи 1,5 - 2 магнитудани ташкил қилган.