Facebook mutaxassislari yangi avlod dasturlash tilini yaratdi

Facebook muhandislari Brayan O’Sallivan, Jilyen Verlage va Alok Mengrajani bir necha yil davomida boshqalariga o‘xshamagan yangi dasturlash tilini ishlab chiqdi. Bu haqda "Sukerberg pozvonit” nashri xabar berdi.

Ijtimoiy tarmoqning boshqa mutaxassislari yordamida ular dasturiy kodning tuzilishini saqlab qolgan holda murakkab sayt va boshqa dasturlarni yaratishning tezkor uslubini yaratdi. Dasturlash tillarining barchasi ham bunday xususiyatga ega emas. Yangi til Hack nomini oldi. Ayni paytda deyarli butun Facebook u bilan ishlab, dunyo bo‘yicha 1,2 milliard kishiga xizmat ko‘rsatmoqda.

Sun Microsystems, Lined Lab kabi mashhur kompaniyalarda ishlab, Haskell dasturlash tilini rivojlantirishga katta hissa qo‘shgan muhandis O’Sallivanning aytishicha, Hack juda og‘ir sinovlardan muvaffaqiyatli o‘ta oldi.

Hack o‘tgan hafta boshidayoq ommaga havola etildi. Har qanday kishi undan foydalanishi va uni yaxshilashga hissa qo‘shishi mumkin.

Dasturlash bo‘yicha taniqli mutaxassis Devid Pollak ushbu loyiha haqida fikr bildirar ekan: "Agar Hack’ni Brayan O’Sallivan yaratgan bo‘lsa, undan foydalanish imkoniyatiga ega bo‘lish uchun har narsaga tayyorman”, — dedi.