Фарғонада илк марта юрак операцияси ўтказилди

Жарроҳлик амалиётида вилоят кўп тармоқли болалар тиббиёт маркази кардиохирурги Жавлон Мўйдинов, жарроҳлик бўлими мудири Иброҳим Умаров, тиббиёт фанлари номзодлари – Андижон давлат тиббиёт институти клиникаси кардиохирурги Абдуносир Турғунов ва Республика ихтисослаштирилган кардиология марказининг анестезиолог-реаниматологи Санжар Омонов иштирок этди, дея хабар беради ЎзА. Жарроҳлик амалиёти ўтказилган ҳар икки беморда туғма юрак нуқсони – очиқ артериал протокни боғлаб қўйиш операцияси муваффақиятли амалга оширилди ва реанимация бўлимида интенсив муолажалар олиб борилди. Болаларнинг аҳволи стабиллашгач, муолажаларни давом эттириш учун жарроҳлик бўлимига ўтказилди. Фурқат туманининг Томоша қишлоғида яшовчи Мирзахўжа Ниёзхўжаев 1999 йилда туғилган. Қўштепа туманидан Икромжон Иброҳимов эса уч ёшда.Шу чоққача бундай операция Тошкентда ёки хорижда амалга ошириларди. Жаҳон соғлиқни сақлаш ташкилоти маълумотига кўра, дунёда ҳар минг чақалоқнинг 6-7 нафарида туғма юрак нуқсони қайд этилади. Бу хасталикни операция йўли билан бутунлай бартараф этиш ва беморни тўлақонли ҳаётга қайтариш мумкин.