Хитой жанубидаги қирпичоқ натижасида олти киши ҳалок бўлди

Хитой жанубидаги Чангша шаҳрида рўй берган қирпичоқ натижасида, аниқлаштирилган маълумотларга кўра, олти киши ҳалок бўлган, дея хабар бермоқда Agence France-Presse ахборот агентлиги. Аввалроқ, низо натижасида тўрт киши ҳалок бўлгани хабар қилинган эди. Ҳодиса озиқ-овқат маҳсулотлари билан савдо қилувчи икки сотувчи ўртасидаги тортишувдан бошланган. Улар нима сабабдан келиша олмай қолгани ҳозирча номаълум. Юзага келган муштлашув натижасида сотувчилардан бири пичоқ билан иккинчисини ўлдириб қўйган. Ҳодиса жойидан қоча туриб, сотувчи яна тўрт кишини жароҳатлаган. Уларнинг икки нафари ҳодиса жойининг ўзида, қолган икки нафари эса шифохонада вафот этган. Аввалроқ, эркакнинг қурбонларидан бири 80 ёшли аёл экани ҳақида хабар берилган эди. Қотилнинг ўзини полиция ходимлари отиб ўлдиришган. Чангша бозоридаги ҳодиса ОАВ томонидан «Хитойнинг 11 сентябри» дея таърифланган воқеалардан кўп ўтмай содир бўлди. 1 март куни Куньмин шаҳар темирйўл вокзалида пичоқ билан қуролланган беш нафар жиноятчи ярим соат ичида 29 кишини ўлдириб, яна 143 кишига тан жароҳати етказган эди. Ҳужумнинг тўрт нафар иштирокчиси ҳодиса жойида отиб ўлдирилган, биттаси эса ҳибсга олинганди. Ушбу ҳаракат учун жавобгарлик Шинжон-Уйғур мухтор тумани (ШУМТ)даги айирмачиларга юкланди.