Toshkentda litseyga kiritish uchun pul talab qilgan o‘qituvchi qo‘lga olindi

Toshkent Davlat pedagogika universiteti qoshidagi akademik litsey direktorining xo‘jalik ishlari bo‘yicha o‘rinbosari lavozimida ishlab kelgan Nosir Boqiyev (ism-familiyalar “Huquq” gazetasi tomonidan o‘zgartirilgan) pulga o‘qishga kirmoqchi bo‘lganlarni o‘z qarmog‘iga ilintirishga harakat qildi. Bu haqda “Huquq” gazetasi xabar berdi.

O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Toshkent shahar boshqarmasi bo‘lim inspektori Shaxriyor Fayziyevning qayd etishicha, Boqiyev 2013-yil iyun oyida jizzaxlik Umar Mansurovning maktabni bitirgan jiyani Sanjar Mansurovni litseyga “o‘qishga kiritib qo‘yaman” deb firibgarlik yo‘li bilan 500 AQSh dollarini qo‘lga kiritmoqchi bo‘lgan. N. Boqiyev U. Mansurovning ishonchiga kirgan va 2013-yilning 18-iyun kuni kelishilgan pulni olib kelishlarini talab qilgan. U. Mansurov uning firibgarlik qilayotganini vaqtida tushunib, kerakli joyga ariza bilan murojaat qilgan.

Kelishilgan kuni N. Boqiyev o‘zining xizmat xonasida 500 AQSh dollari olayotgan vaqtida huquqni muhofaza qiluvchi organ xodimlari tomonidan ashyoviy dalil bilan qo‘lga olindi. Jinoyat ishlari bo‘yicha Toshkent shahar sudi N. Boqiyevga qilmishiga yarasha jazo ta­yinlab, hukm chiqardi.