“Бунёдкор”га техник мағлубият ёзилиши мумкин

Хабарингиз бор, Қатарда бўлиб ўтган “Ал Жаиш” - “Бунёдкор” баҳсида тошкентликлар 2:1 ҳисобида ғалаба қозониб, кейинги босқичга чиқишди. “Ал Жаиш” эса мағлубиятга учрагани туфайли гуруҳдан чиқа олмади, ваҳоланки, уларни дуранг ҳам қониқтирарди.

Баҳс якунига етганидан сўнг орадан кўп ўтмай “Ал Жаиш” “Бунёдкор” иштирокидаги ўйинларга техник мағлубият ёзиш кераклиги ҳақида ОФКга мурожаат қилди, дея хабар бермоқдаChampionat.asia нашри. Бунга сабаб этиб “Бунёдкор” футболчиси Анвар Ғофуровнинг бу йилги ОЧЛда иккита клуб таркибида майдонга тушгани кўрсатилган. 

Яхши биласиз, Анвар Ғофуров шу йилнинг ўзида дастлаб “Локомотив” (плей-офф), кейин “Бунёдкор” (гуруҳ босқичи) сафида ОЧЛ ўйинларида майдонга тушди. Хусусан Қатардаги беллашувда 6-рақамда тўп сурган Ғофуров майдонда тўлиқ ҳаракат қилди. 

“Ал Жаиш” ёзган шикоят хатида футболчининг бу йилги ОЧЛда иккита клуб таркибида ўйнагани асос қилиб олинган ва уларнинг фикрича, бу ерда регламент бузилган. Бизга маълум бўлишича, ОФК ҳозир шу масалани ўрганиб чиқяпти.